Mar 5 | MHL | STEP | Aria Yeesus ona teeria onaiya ikiwep kame okaiwi fuunemik. Epa nain wi Gerasa miiwa-ke.

Mark 5

Yeesus-ke sawur mua momora mia-pa ikemik nain wia faek

(Matiu 8.28-34, Luk 8.26-39)

1 Aria Yeesus ona teeria onaiya ikiwep kame okaiwi fuunemik. Epa nain wi Gerasa miiwa-ke. 2 Ne aria Yeesus aasa piipuap oreya mua oko-ke urufap karuwiw ekapok. Mua nain iiriwiw sawur-ke anirawap ikemik. O piawemi nomon ona matmat-pa neeke piawiwkin mia wame pu-puukami uura amirika naap omem-miawiya. Seniw kaikimik-na, uufunemi sen nain pu-puukiya.

6 Ne mua nain Yeesus urufap karuwiw ekapemi o miir onoma-pa keema muuna miiwa-pa mikeya 7 Yeesus-ke maakek, “Sawur, mua fain piipuap ikiweka.” Naeya mua momora nain-ke kiriremi maek, “Yeesus, Iinan Mua Maneka Muuka, yo efa samorekam naep ekapon-i? Mua Maneka unuma-pa nefa maakiyem, yo me efa samore!” 9 Naeya Yeesus-ke nokarek, “No unuma kamenap?” Naap nokareya maek, “Yo unuma Pamua. Moram i yiam unowa ikemik.” 10 Naemi i epa oko-pa me yia sesekinok naep sisewaremik.

11 Epa nain waa teeria ema kiira-pa nan yeem-ikemik. 12 Aria wi sawur nain-ke Yeesus omawami maakemik, “I yia sesekeya mua fain piipuap waa teeria nain mia-pa wiar ikaiyen.” 13 Naeya eliw wia naek. Ne sawur nain orop waa teeria anirawamik. Waaya tausen erup naap ikomakek nain karuw-iwami een fuura-pa oromi eka enep umurumemik.

14 Ne wi waaya nepiow mua nain naap urufap bauraremik. Ikiwemi owow unowa ne owow maneka ikiwep wia maakemik. Ne owow mua unowa maa imenarek nain urufu naep ikiwemik. 15 Wi ikiwep Yeesus urufamik-na mua iiriw sawur anirawap ikua nain sariarep nan pokap ikua. Ikiwosa eliwa wiar ekapeya konima ainep nan pokap ikua. Wi naap urufap keker opamik.

16 Wi mua maa urufamik nain-ke Yeesus maemi mua sawur onaiya ikaeya saliwak nain wia nanaromamik. Ne Yeesus sawur wia sesekeya waaya wiar iramik nain pun wia nanaromamik. 17 Wi naap miimap Yeesus kame yiar piipuinok naep maakemik. 18 Aria Yeesus orop aasa iram-ikaeya mua eena saliwak nain-ke omawami maakek, “Yo nookinen aa.” 19 Naeya iiraremi maakek, “Weetak, no nena owowa ikiwemi Mua Maneka nefa kemalep kamenap nefa saliwak nain nena owow mua ne nena kaka wia maake.” 20 Naap maakeya Dekapolis kame ikiwep Yeesus o saliwak nain wia maakem-miek. Ne wi naap miimap soranemik.

Yeesus wiip takira iikirowak ne emeria oko pun saliwak

(Matiu 9.18-26, Luk 8.40-56)

21 Aria Yeesus ona teeria onaiya aasa irap kirep Galili eka kame okaiwi nainiw ekamik. Ekap aasa me purupowa ikaiwkin mua teeria maneka o ookap ekapep warikamik. 22 Ne lotu koora woos mua oko unuma Yairus naimik nain ekapok. Yeesus urufap meren onoma-pa keema muuna mikap maara mikami omawami maakek, “Emawa. Yo wiip gelemuta samor akena efar napumarep umekam naep oniya. Sira eliwa no-ko ekapep nena wapena o mia-pa wiar wueya sariarinok aa.” 24 Naeya o ookap ikiwem-ikaeya yakeyak maneka o warikap ikiwemik.

25 Ne emeria oko pun nan ikua. O mia akaiyarem-ikua nain mokoma ten kuisow erup. Ikemika kaikow mua wiar ikiwem-ikua nain-ko me sariarek. Napuma naap wiar ikua. Ne maamuma pun weeser-wuak ne napuma iiwawun wiar kurumarek. 27 Emeria nain Yeesus maiwkin miimap ekapok. Ne mua teeria maneka wiamiya Yeesus murarep ookami ona kemaiw maek, “O mia suuwowa wiar tiiminen-na sariarinen.” 29 Naap maep mamaiya ekap mia suuwowa wiar tiimak. Ne mia akaiyarem-ikua nain wiar weeserek. Ne o wame furewak-na mia iiwawun sariarek. 30 O Yeesus tiimeya ewuriw akena kekanowa wiar ikiwok nain wame furewap kiremi wia nokarek, “Nee, naareke mia suuwowa efar tiimak?” 31 Naeya ona teeria-ke maakemik, “Sa, mua unowa nefa warikap suuw-iraparimik, naeya nefa tiimak nain i kamenap amisariyen? Ne naap yia nokaren?” 32 Ne Yeesus mua naareke efa tiimak naep mua unowa wia mokak-ikiwok.

33 Ne wia, emeria eena sariarek nain wame furewap kema tootonek. Ne ekap Yeesus wameiya-pa keema muuna miiwa-pa mikap maakek, “Makena, yos-ke napumarep konima nefar tiimap sariarem.” 34 Naeya maakek, “Aite, yo kekanowa efar naep naap onan, naep sariaren. Ikiwep kema eliwiw ike. No napuma nefar weeserek.”

35 Aria Yeesus maem-ikaeya mua papako Yairus koora-pa ikemik nain-ke ekapep o maakemik, “No wiipa iiwawun umok aa. Somek mua moram maneka pikiwinan, neek ikainok.” 36 Ne Yeesus wi opora me wiar miimowa woos mua nain maakek, “No kema me tootone, kekanowa makena efar nae.” 37 Naap maakep-puap mua papako wia iirarep Pita, Yems ne Yon wiam arow naap wia aawep woos mua nain koora wiar ikiwemik. Ikiwep fuunemik-na emeria mua unowa omem-ikaiwkin wia urufak. 39 Ne koora urupep wia maakek, “Ni moram kerew omomiman? Wiipa me wiar umok. Inep ikua.”

40 Naap wia maakeya amap-niiremik. Naeya unowa nain wia iirarek. Wiipa nain onak wiawi, ne ona teeria mua wiam arow nain, wi muutiw o ookap koor kemena ikiwemik. 41 Ekami wiipa nain wapena wiar opap maakek, “Talita kum.” Opora nain kemena feenap, “Wiip takira, nefa maakiyem, no iikire.” 42 Naap maakeya iikirap soomarek. O mokoma ten kuisow erup. Ne wi nan ikemik nain naap urufap manek akena soranemik. 43 Ne Yeesus-ke opor kekanowa wia maakek, “Yo sira onam fain me wia maakeka. Aakisa wiipa maa enowa-ko onakeka.”